Тошкентда 22 ёшли аёл ўз тенгдошларини сотиб юбормоқчи бўлди

 

Тошкент вилоятида ИИББ томонидан ўтказилган тезкор тадбирда қизларни алдов йўли билан Россияга жўнатаётган 22 ёшли аёл Тошкент халқаро аэропортида қўлга олинди.

 

ҚАйд этилишича, Тошкент вилояти ИИББ ва унинг қуйи тизим тезкор ходимлари томонидан навбатдаги одам савдоси билан боғлиқ ҳолатга чек қўйилди. Назорат тадбири давомида Янгийўл туманида яшовчи, 2002 йилда туғилган, Бону тахаллуси билан танилган аёл Тошкент ва Хоразм вилоятида яшовчи икки нафар тенгдоши (аёллар)ни мўмай даромад топадиган иш топиб беришни ваъда қилиб, фоҳишалик билан шуғулланиш мақсадида (Тошкент халқаро аэропортидан Тошкент—Жуковский авиарейси орқали) Россияга жўнатаётган вақтида ушланди.

 

Мазкур ҳолатлар юзасидан ушланган шахсга нисбатан Жиноят кодекси 135-моддаси билан жиноят иши қўзғатилган. Тергов ҳаракатлари олиб борилмоқда.

 

Маълумот берилишича, 2023 йил давомида вилоят ИИББ ва унинг қуйи тизим ходимлари томонидан одам савдосига қарши кураш йўналишида амалга оширилган тезкор-қидирув тадбирлари натижасида Тошкент вилоятида 15 нафар фуқаро одам савдоси қурбони бўлишининг олди олинди.

 

Аниқланган ҳолатлар юзасидан 19 нафар аёл ва 3 нафар эркак, жами 22 нафар шахсга нисбатан жазо муқаррарлиги таъминланиб, жиноий жавобгарликка тортилган.