Toshkent shahrida mashina sotuvini eʼlon qilgan yigit mijozning puliga ega chiqish uchun unga suiqasd qildi. Bu haqida Bosh prokuratura matbuot kotibi Hayot Shamsutdinov maʼlum qildi.
Qayd etilishicha, voqea kecha, 2 avgust kuni 11-12 lar orasida Chilonzor tumani Bekto‘pi mahallasi Poygoh ko‘chasida sodir bo‘lgan.
2004 yilda tug‘ilgan erkak onlayn savdo platformasiga Damas avtomashinasini sotishi haqida eʼlon joylashtirgan. U eʼlon bo‘yicha murojaat qilgan 1987-yilda tug‘ilgan erkak bilan tanishib, dastlab 100 AQSH dollarini avans sifatida olgan va 37 yoshli mijozda avtomashina sotib olish uchun 4500 AQSH dollari borligiga ishonch hosil qilgan. 2 avgust kuni u pullarni qo‘lga kiritish maqsadida unga suiqasd uyushtirgan.
Hodisa oqibatida jabrlanuvchi tan jarohati olgan.
Mazkur holat bo‘yicha Jinoyat kodeksining 25- (Jinoyatga tayyorgarlik ko‘rish va jinoyat sodir etishga suiqasd qilish), 97- (Qasddan odam o‘ldirish)va 164-moddalari (Bosqinchilik) bilan jinoyat ishi qo‘zg‘atildi. gumonlanuvchi protsessual tartibda ushlangan.