Иш жойидаги бахтсиз ҳодисалар оқибати: 10 ойда 231 киши ҳалок бўлди
Январь–октябрь ойларида Ўзбекистонда ишлаб чиқариш билан боғлиқ 771 та бахтсиз ҳодиса қайд этилган.

2026 йилнинг январь–октябрь ойларида Ўзбекистонда ишлаб чиқариш билан боғлиқ 771 та бахтсиз ҳодиса қайд этилди. Уларнинг оқибатида 231 киши ҳалок бўлган. Бу ҳақда Давлат меҳнат инспекцияси матбуот хизмати маълум қилди.
Қайд этилган бахтсиз ҳодисаларнинг 38 таси гуруҳли, 542 таси оғир оқибатли, 189 таси эса ўлим билан якунланган.
Жами 847 нафар фуқаро жабрланган. Уларнинг 486 нафари оғир, 30 нафари енгил тан жароҳати олган, 231 нафари эса вафот этган.
Шунингдек, бахтсиз ҳодисалар оқибатида жабрланганларга етказилган зарар учун 16 миллиард 637 миллион сўм миқдорида бир йўла ва ойлик тўловлар ундириб берилган.
Давлат меҳнат инспекцияси меҳнат хавфсизлиги ҳар бир иш жойида устувор масала бўлиши кераклигини таъкидлади.








