Bu haqda SSV Matbuot xizmati Respublika Shoshilinch tibbiy yordam ilmiy markazi Toshkent shahar tez tibbiy yordam stansiyasi bosh shifokori Doniyor Bo‘ribayevning so‘zlariga tayanib ma’lum qildi.
Doniyor Bo‘ribayevga ko‘ra, iyul oyining 28-sanasiga qadar “Tez yordam” xizmatiga murojaat qilgan 12 ming 38 nafar katta yoshli va 895 nafar 18 yoshgacha bo‘lgan ana shunday bemorlarga sifatli tez tibbiy yordam ko‘rsatilgan.
– Ayni paytda shahar “103” xizmati CALL-markaziga bir kunda o‘rtacha 4700 nafar fuqaro murojaat qilmoqda. Jumladan, so‘nggi 10 kun ichida (19 iyuldan – 28 iyulgacha) 46 ming 569 ta chaqiriq kelib tushgan bo‘lsa, shundan pnevmoniya belgilari kuzatilgan, koronavirus tashxisi qo‘yilgan va boshqa yuqumli kasalliklar bilan 12 ming 933 nafar bemorga sifatli tez tibbiy yordam ko‘rsatildi, – deydi RShTYoIM Toshkent shahar bo‘limi shifokori.
Qayd etilishicha, bunda fuqarolar, asosan, tana haroratining oshishi, bosh og‘rig‘i, nafas olishning qiyinlashishi, ko‘ngil aynishi, qon bosimining keskin ko‘tarilishi kabi simptomlar bilan murojaat qilmoqda.
SSV fuqarolarga haroratning ko‘tarilishi faqat koronavirus infeksiyasi yoki pnevmoniyaning simptomi emasligini eslatib, ulardan “Tez yordam”ga murojaat qilishda buni inobatga olishlarini so‘ramoqda.
“Odamning istimasi 37-37,5 yoki 38 darajaga chiqishi bilan darrov ahvoli og‘irlashib qolmaydi. Shu bois, xalqimiz buni to‘g‘ri tushunishi, agar shunday bo‘lgan taqdirda, eng avvalo, oilaviy shifokorga murojaat qilishi va uning tavsiyalariga rioya etishi zarur”, – deyiladi SSV ma’lumotida.
Ma’lum qilinishicha, ayni vaqtda shahar “103” xizmati CALL-markazi operatorlari soni qo‘shimcha 40 nafarga oshirilib, jami 80 nafarga yetkazilgan.