Ўзбек киноижодкорлари Туркияда
Ҳамкорликни яна мустаҳкамлаш юзасидан телесериаллар ишлаб чиқариш бўйича икки давлат ўртасида меморандумлар имзоланиши кутилмоқда.
Туркияда бўлиб ўтаётган “Korkut ata” халқаро кинофестивалида таниқли киноижодкорлардан иборат ўзбек делегацияси ҳам иштирок этмоқда.
Фестивалда ткркияликлар ўзбек киноижодкорларини катта тантана билан қарши олишди.
Фестиваль доирасида Ўзбекистон Кинематография агентлиги буюртмасига биноан суратга олинган режиссёр Али Ҳамраевнинг “Халқ жасорати” ва Жаҳонгир Аҳмедовнинг “Илҳақ” фильмлари премьераси бўлиб ўтди. Шунингдек, Кинематография агентлиги Бош директори Фирдавс Абдухолиқов томонидан Туркия Республикаси Маданият ва туризм вазири Меҳмет Эрсойга “Ўзбекистон маданий мероси жаҳон тўпламларида” китоб альбоми тақдим этилди.
Кинофестивалда ўзбекистонлик киноижодкорлар томонидан “Ўзбек кино кунлари” ижодий кечаси ҳамда Рашид Маликов режиссёрлигида яратилган “Тутқунлик” фильмининг премьераси бўлиб ўтиши ҳам режалаштирилган.
Ўзбекистон ва Туркия кинематографистлари ҳамкорлигини яна мустаҳкамлаш юзасидан телесериаллар ишлаб чиқариш бўйича меморандумлар имзоланиши кутилмоқда.
"Korkut ata” халқаро кинофестивали 12 ноябргача давом этади.
Аввалроқ “Ипак йўли дурдонаси” ХIII Тошкент халқаро кинофестивалига Туркиялик бир гуруҳ киноижодкорлар ташриф буюришгани ҳамда Турк ва ҳинд киноижодкорлари билан ижодий кеча ташкил этилгани ҳақида хабар берилганди.
Муножат Валиева
