Rasmiy Anqara Rossiyaga qarshi sanksiya joriy etmoqchi emas.
Bu haqda Rajab Toyib Erdo‘g‘anning rasmiy vakili Ibrohim Kalin maʼlum qildi.
Uning so‘zlariga ko‘ra, bu Moskva bilan muloqot kanali saqlanib qolishi uchun muhim.
“Biz o‘z davlatimiz manfaatlari yuzasidan harakatlanishimiz kerak. Rossiya bilan muzokara olib bora oladigan tomon bo‘lish kerak. Barcha aloqalar uzilganda kim Moskva bilan gaplashadi? Biz bu kanal saqlanib qolishi uchun ham sanksiyalar joriy etishni rejalashtirmayapmiz”, – degan u CNN Turk telekanaliga bergan intervyusida.
Shuningdek, u Anqaraga zarar yetkazadigan choralar ko‘rilmasligini taʼkidlagan. Siyosatchining so‘zlariga ko‘ra, Turkiyaning "Rossiya bilan turizm, tabiiy gaz yetkazib berish, qishloq xo‘jaligi sohalarida qalin savdo aloqalari bor”.
Maʼlumot o‘rnida: 24 fevral kuni Rossiya Ukraina sharqida maxsus operatsiya boshlashini eʼlon qildi. Hozirda mamlakatning turli nuqtalarida janglar ketmoqda. G‘arb bunga javoban Moskvaga sanksiyalar joriy etdi. Qora ro‘yxatda Putin, RF tashqi ishlar vaziri Sergey Lavrov va boshqa ko‘plab oliy martabali amaldorlar ham bor.
Eslatib o‘tamiz, avvalroq Zelenskiy Bayden bilan telefonda muloqot qilgani to‘g‘risida xabar berilgandi.