Учта вилоятда 2 миллиард сўмдан ортиқ давлат харидлари бекор қилинди
Бу ҳақда Коррупцияга қарши курашиш агентлиги хабар берди.
Агентликнинг масофавий мониторинг тартибидаги ўрганишлари давомида Ўзбекистоннинг уч ҳудудида 2 миллиард 374 миллион сўмлик давлат харидлари бекор қилинди. Хусусан, қуйидаги давлат буюртмачилари томонидан амалга оширилган давлат харидларида қонунчилик талаблари бузилишига йўл қўйилгани аниқланди:
— Ховос туман йўллардан фойдаланиш унитар корхонаси буюртмачилигида юк ташиш хизматини кўрсатиш бўйича ўтказилган 700 миллион сўмлик давлат хариди;
— Андижон вилоят кўп тармоқли тиббиёт маркази буюртмачилигида аутсорсинг хизмати кўрсатиш бўйича ўтказилган 174,0 миллион сўмлик давлат хариди;
— Тошкент вилояти ихтисослаштирилган соматика шифохонаси буюртмачилигида қурилиш маҳсулотлари харид қилиш бўйича ўтказилган 1,5 миллиард сўмлик давлат хариди.
