Европа Иттифоқи тухум инқирозини эълон қилди
Парранда гриппи Европада тухум тақчиллигига сабаб бўлмоқда.
Европа Иттифоқида тухум бозорида жиддий инқироз юзага келгани эълон қилинди. Европа Парламенти аъзоси Даниел Буда ушбу масала бўйича Еврокомиссияга мурожаат қилиб, зарур чоралар кўришни талаб қилди.
Парламентарийга кўра, тухум таъминотидаги муаммоларнинг асосий сабаби қуш гриппининг кенг тарқалиши бўлиб, айниқса, Полшада миллионлаб паррандалар нобуд бўлиши бозордаги беқарорликка олиб келган. Бу эса қишлоқ хўжалиги секторига ҳам салбий таъсир кўрсатмоқда.
Буда Еврокомиссиядан зарар кўрган ишлаб чиқарувчиларни қўллаб-қувватлаш ва тухум таъминотидаги муаммоларни бартараф этиш бўйича қандай чоралар режалаштирилаётганини тушунтиришни сўради.
Аввалроқ, 2024 йилнинг октябрь ойида Реутерс Европада парранда гриппи ҳолатлари ортиб бораётгани ва бу тухум таъминотида жиддий муаммолар келтириб чиқариши мумкинлиги ҳақида огоҳлантирган эди. Шу билан бирга, АҚШда ҳам тухум тақчиллиги кузатилган бўлиб, нархларнинг ошиши сабабли дўконлар маҳсулот сотиб олишга чекловлар жорий қилишга мажбур бўлган.
