2022 йил 1 январидан айрим давлат хизматлари учун тўлов ундирилмайди
Президент фармонига кўра, 2022 йил 1 январдан хорижга чиқиш паспорти, тадбиркорлик субъектларини рўйхатдан ўтганлиги тўғрисида янги намунадаги гувоҳнома, адвокатлик бюро, фирма ва ҳайъатларини рўйхатдан ўтказиш учун тўлов миқдорлари арзонлаштирилади. Хусусий бандлик агентликлари реестрига киритиш хизмати эса бепул бўлади.
Қарорга мувофиқ 1 январдан бошлаб бир қатор давлат хизматлар учун ундириладиган тўловлар камайтирилади ва айримлари учун тўлов бекор қилинади. Бу президентнинг 24 июлдаги фармонида белгилаб қўйилди.
Янги йилдан Ўзбекистон фуқароларига хорижга чиқиш учун биометрик паспорт олиш хизмати нархи БҲМнинг 1 баравари — 245 минг сўм (ҳозирда БҲМнинг 1,2 баравари — 294 минг сўм) этиб белгиланмоқда.
Тадбиркорлик субъектларига давлат рўйхатидан ўтказилгани тўғрисида янги намунадаги гувоҳнома бериш БҲМнинг 20 фоизи — 49 минг сўмни (ҳозирда БҲМнинг 1 баравари — 245 минг сўм) ташкил этади.
Адвокатлик бюроларини, адвокатлик фирмаларини ва адвокатлар ҳайъатларини давлат рўйхатидан ўтказиш учун БҲМнинг 1 баравари — 245 минг сўм тўлов (ҳозирда БҲМнинг 2 баравари — 490 минг сўм) ундирилади.
Шунингдек, хусусий бандлик агентликлари реестрига киритиш янги тартиб билан бепул (ҳозирда БҲМнинг 1 баравари — 245 минг сўм) бўлади.
Бундан ташқари, ҳужжат билан 1 январдан бошлаб давлат хизматларини кўрсатганлик учун ундириладиган давлат божлари, йиғимлар ва бошқа ҳар қандай тўловларнинг хизмат кўрсатиш учун масъул давлат органлари ва ташкилотлари ҳисобига йўналтириладиган қисмининг камида 20 фоизи ушбу ташкилотда ахборот технологияларини ривожлантириш, шунингдек, қоғоз кўринишдаги ҳужжатларни рақамлаштириш учун йўналтирилади. Ва буни Молия вазирлиги Ахборот технологиялари ва коммуникацияларини ривожлантириш вазирлиги билан биргаликда доимий равишда мониторинг қилиб боради.
