Тахиатош ИИБга олиб кетилган фуқаронинг ўлими юзасидан маълумот берилди

Ички ишлар вазирлиги матбуот котиби Шохруҳ Ғиёсов ижтимоий тармоқларда «Тахиатош туманида ички ишлар органи ходими фуқаронинг ўлимига сабабчи бўлди» сарлавҳаси остида тарқалган хабарлар бўйича маълумот берди.

Қайд этилишича, 2021 йилнинг 23 май куни соат 11:00 лар чамасида Қорақалпоғистон Республикаси Тахиатош тумани ИИБ навбатчилик қисмининг 102 телефон рақамига ўзини Рамазан кўчасида яшовчи Ғулом деб таништирган фуқаро қўнғироқ қилиб, 7-уйнинг олдида бир маст фуқаро ётгани тўғрисида хабар берган. Мазкур хабар юзасидан воқеа жойига ҳуқуқбузарликлар профилактикаси инспектори капитан С.Баймуратов борган.

Капитан С.Баймуратов Рамазан кўчасига борганида, ўзини Б.Тажимуратов деб таништирган маст фуқарони тиббиёт бирлашмасига олиб борган ва шифокор кўригидан ўтказиб, Б.Тажимуратовнинг мастлиги ва жароҳати ҳақида алкоголли ичимлик таъсирида мастлик, ўпкага лат етиши, чап қош соҳасида жароҳат ташҳиси билан маълумотнома олган.

Капитан С.Баймуратов фуқаро Б.Тажимуратовни навбатчилик бўлимига олиб келиб топшириб, воқеа юзасидан бўлим бошлиғи номига билдирги билан ахборот берган.

Фуқаро Б.Тажимуратовнинг соғлиғи бўлимнинг ҳушёрлик хонасида ёмонлашгани сабаб шу кунги навбатчилик қисми навбатчиси томонидан тез ёрдам чақирилиб, Б.Тажимуратов касалхонага юборилган. Кейинчалик фуқаронинг шахси суриштирилганда, у Тахиатош туманида яшовчи Б.Даулетмуратов экани аниқланган.

2021 йилнинг 28 май куни фуқаро Б.Даулетмуратовнинг опаси Тахиатош тумани Танташов кўчасида яшовчи фуқаро С.Даулетмуратова Тахиатош туман прокуратурасига ариза билан мурожаат қилиб, укасини профилактика инспектори капитан С.Баймуратов уриб, тан жароҳат етказганини кўрсатган.

Мазкур мурожаат бўйича туман прокуратураси томонидан терговолди суриштирув ишлари олиб борилиб, 28 июнь куни капитан С.Баймуратовнинг хатти-ҳаракатларида ҳеч қандай қонунбузилиш ҳолатлари аниқланмагани тўғрисида хулоса қабул қилинган.

Ҳолат юзасидан Қорақалпоғистон прокуратураси ҳам муносабат билдириб, ҳозирги кунда Б.Даулетмуратов ўлими ҳолати юзасидан Қорақалпоғистон Республикаси прокуратураси томонидан терговга қадар текширув ҳаракатлари олиб борилаётганини маълум қилган.

Ҳолат бўйича Тахиатош тумани ИИБ ходимларининг хатти-ҳаракатлари юзасидан хизмат текшируви ва марҳум Б.Даулетмуратовнинг ўлими сабабини аниқлаш мақсадида суд-тиббий экспертизаси тайинланган.

Мазкур терговга қадар текширув ҳаракати шахсан Қорақалпоғистон Республикаси прокурори назоратига олинган.