АҚШ мудофаа вазири Япония ва кореялик ҳамкасблари билан гаплашди
АҚШ Мудофаа вазири Ллойд Остин Япония ва Корея Мудофаа вазирлари Нобуо Киси ва Со Ук билан телефон орқали суҳбатлашди.
Бу ҳақда Пентагон хабар қилмоқда.
“Мудофаа вазири Ллойд Остин Корея Республикаси мудофаа вазири Со Ук билан АҚШ ва Корея Республикаси ўртасидаги бузилмас иттифоқни тасдиқлаш ва икки давлат ўртасидаги яқин ҳамкорликнинг аҳамиятини таъкидлаш учун телефон орқали суҳбатлашди... Иккала тараф ҳам қўшма мудофаа сиёсатининг аҳамиятини тасдиқлади”, - деди Пентагон ахборот котиби Жон Кирби.
Улар шунингдек, Корея яриморолида хавфсизлик масаласини ҳам муҳокама қилишди.
“Ллойд Остин Япония мудофаа вазири Нобуо Киси билан ҳам телефон орқали суҳбатлашди. У АҚШ ва Япония иттифоқини Америка қўллаб-қувватлашини таъкидлаб, эркин ва очиқ Ҳинд-Тинч океани ҳудудини сақлашда бунинг аҳамиятини қайд этди”, - дейилади Пентагон хабарида.
Шарофат Маҳмудова
