Тошкентда “Spark”дан гиёҳванд модда чиқди
Энг кўп фош этиладиган жиноятлардан бири бу гиёҳванд моддалар билан боғлиқ жиноятлардир. Мўмай даромад илинжи ёки нафсига қул кимсалар томонидан содир этилаётган бу жиноят туфайли қанчадан-қанча одамлар жавобгарликка тортилади, тонналаб гиёҳванд моддалар йўқ қилинади. Лекин орамизда яширин йўллар билан бу қабиҳ ишга қўл ураётганлар ҳам кўплаб топилади.
Навбатдаги гиёҳванд моддалар билан боғлиқ ҳолат жорий йилнинг 29 август куни Чилонзор туманида аниқланди. Хизматга жалб этилган Тошкент шаҳар ИИББ ЙҲХБ ЙПХ инспекторлари Бунёдкор кўчаси бўйлаб ҳаракатланиб келаётган, “Spark” русумли, давлат рақами 01 С 414 UA бўлган автоулов тўхтатиб, текширганда машина салонидан целофан пакетчада, кукунсимон модда топилиб, холис гувоҳлар иштирокида олинди.
Мазкур ҳолат юзасидан тегишли ҳужжатлар расмийлаштирилиб, ҳайдовчи К.А. Чилонзор тумани ИИО ФМБ 2-ИИБга топширилган.
Эслатиб ўтамиз, аввалроқ Сергели туманидаги заводлардан бирида Республика ҳуқуқни муҳофаза қилиш идоралари томонидан ноқонуний муомаладан мусодара қилинган 1 тонна 350 кг.га яқин гиёҳвандлик воситалари ёқиб юборилгани хақида маълумот берган эдик.
Муножат Валиева
