Буюк Британия афғон қочқинлари учун 40 миллион доллардан ортиқ ёрдам ажратди
Буюк Британия Афғонистон билан чегарадош республикаларга 30 миллион фунт-стерлинг (41.5 миллион доллар) миқдорда ёрдам беради. Бу маблағ қочқинлар учун лагер ва санитар-техник иншоотлар қуриш мақсадида ишлатилади.
Маълум бўлишича, 10 миллион фунт-стерлинг ($14 млн) дарҳол гуманитар ташкилотлар, хусусан, БМТ қочқинлар масаласи бўйича Олий Комиссари бошқармасига ўтказиб берилади. Қолган 20 миллион фунт ($28 млн) минглаб афғон қочқинларининг асосий оқимини қабул қилаётган давлатлар — Ўзбекистон, Эрон, Туркманистон, Тожикистон ва Покистонга ёрдам сифатида тақдим этилади.
“Биз Афғонистондан қочганларга ёрдам беришимиз муҳим. Инқироз минтақа барқарорлигига зарар етказмаслиги керак. Шу сабабли, бу маблағларни бериш мақсадга мувофиқ. Ушбу пуллар ҳамма нарсани ташлаб чиққан афғонларни зарурий воситалар билан таъминлашга ёрдам беради. Бу уларга бошпана ва санитар иншоотларини тақдим этади”, деган Буюк Британия ташқи ишлар вазири Доминик Рааб.
Сўнгги вақтларда Европа давлатлари Афғонистон қочқинларига маблағ ажратмоқда. Жорий йилнинг 3 cентябрь куни “Financial Times” Марказий Осиё давлатлари кочқинларни қабул қилган тақдирда минтақа мамлакатларига 600 миллион евро ажратишини маълум қилди. Бундан кўзланган мақсад –– Европада навбатдаги миграцион инқирознинг олдини олишдир.
Афғонистон қўшнилари ҳам қочқинларни қабул қилишни истамаяпти. Масалан, Покистон шу йил 2 сентябрда афғон мигрантларини киритмаслигини маълум қилди. Ҳозирда Покистонда уларнинг сони 3.5 миллион кишидан ортиқ. Эрон ва Туркия ҳам шу позицияда.
Эслатиб ўтамиз, аввалроқ минглаб британияликлар афғон қочқинларига уйидан жой бермоқчи экани ҳақида хабар берилганди.
Жаҳонгир Қўзиев
