Тошкент вилоятида коронавирусга қарши эмланганидан сўнг вафот этгани айтилган фуқаро бўйича ҳолат назоратга олинди
Ижтимоий тармоқларда Тошкент вилояти Ўрта Чирчиқ туманида яшовчи аёл Т.Қ.нинг мурожаати тарқалди. Унда фуқаро фарзанди С.Қ.нинг тиббий кўрикдан ўтказилмасдан эмлангани, натижада аҳволи оғирлашиб вафот этгани ҳақида айтади.
Тошкент вилоятининг Ўрта Чирчиқ туманида яшовчи онахоннинг мурожаати назоратга олинди, деб хабар беради ССВ матбуот хизмати.
Мазкур ҳолат Соғлиқни сақлаш вазирлиги томонидан назоратга олинган. Вазиятни ўрганиш мақсадида тезкор гуруҳ тузилиб, Ўрта Чирчиқ туманига юборилган.
Вазирлик ўрганишлар натижаси ҳақида батафсил маълумот берилишини маълум қилган.
Аввалроқ ижтимоий тармоқларда Хоразм вилоятида вакцина олгандан сўнг аҳволи оғирлашган фуқаро ҳақида видеолавҳа тарқалгач, Соғлиқни сақлаш вазирлиги ушбу вазиятни назоратга олгани, унинг аҳволини ўрганиш, бу ҳолат нима сабабдан юз берганига аниқлик киритиш мақсадида тезкор мутахассислар гуруҳи тузилгани ҳақида хабар берилган эди.
