Халқаро Олимпия қўмитаси КХДР МОҚни жазолади
Халқаро Олимпия қўмитаси Корея Халқ Демократик Республикаси Миллий олимпия қўмитасини 2022 йил охиригача дисквалификация қилишини эълон қилди.
Бу ушбу ташкилот ҳомийлигида ҳаракат қиладиган спортчилар Пекин Қишки Олимпия ўйинларида қатнаша олмаслигини англатади. Бу ҳақда “Cgtn” сайти хабар бермоқда.
Шунингдек, Халқаро Олимпия қўмитаси КХДР МОҚни молиялаштиришни тўхтатди ва унга ҳеч қандай ёрдам кўрсатмайди. Мамлакатнинг Токиода ўтган ёзги Олимпиадада қатнашишдан бош тортганидан сўнг ана шундай қарорга келинди,чунки бу Олимпия Хартиясини бузиш ҳисобланади.
"КХДР Миллий олимпия қўмитаси Токио Олимпиадасида қатнашмаган ягона миллий қўмита бўлди. Бу Олимпия Хартияси ва ўз спортчиларини ўйинларга юбориш мажбуриятини бузишдир", - деди ХОҚ президенти Томас Бах.
КХДР Миллий олимпия қўмитаси рад жавобини коронавирус пандемияси билан боғлаган.
Аввалроқ Халқаро олимпия қўмитаси (ХОҚ) 2032 йилги ёзги Олимпия ва Паралимпия ўйинлари Австралиянинг Брисбен шаҳрида ўтказилишини эълон қилганди.
Насиба Тўхтаева
