Россиянинг Хабаровск ўлкасида ғойиб бўлган самолёт топилди

 

 

Россиянинг Хабаровск ўлкасида 22 сентябрь куни ғойиб бўлган Ан-26 самолёти бўлаклари Корфовский қишлоғи яқинидаги тоғ этагида жойлашган Болшехехсирский қўриқхонасидан топилди.

 

 Воқеага Россия Тергов қўмитаси веб-сайтида қуйидагича изоҳ берилди:

 

“2021 йил 23 сентябрь куни маҳаллий вақт билан 12:00 да Болшехехсирский давлат қўриқхонаси тизмасининг тепасида қидирув ишлари олиб борилаётган вақтда ҳалокатга учрагани тахмин қилинаётган Ан-26 самолётининг бўлаклари топилди”.

 

Ҳалокат жойи Фавқулодда вазиятлар вазирлигининг вертолёти ёрдамида аниқланган. Самолёт ноқулай жойга қулаб тушгани туфайли қутқарувчилар у ерга қийинчилик билан етиб борган.

 

Ҳодиса рўй берган жойга борилганда, экипаж аъзоларининг ҳаммаси ҳалок бўлгани аниқланди.

 

“Москва вақти билан 10:55 да биринчи қидирув гуруҳи Ан-26 ҳалокатга учраган жойга етиб борди. Экипажнинг барча аъзолари ҳалок бўлган, уларнинг жасади топилди”, — дея хабар қилди "РИА Новости".

 

Ан-26 самолёти кечқурун радарлардан ғойиб бўлди ва Хабаровскдан 40 километр узоқликда у билан алоқа узилди.  “Парвоз текширувлари ва тизимлари”  компаниясига тегишли самолёт Хабаровск ўлкасида алоқа воситалари ва радиолокация ускуналарини текшириш билан шуғулланаётган эди. Самолёт бортида 6 киши бўлган.

 

Ҳалокатнинг дастлабки сабаблари ёмон об-ҳаво шароити ёки учувчиларнинг хатоси деб баҳоланмоқда. Тергов қўмитаси ҳодиса юзасидан жиноий иш очди.

 

Эслатиб ўтамиз, бундан аввал Ҳиндистон ҳаво кучларининг Mig – 21 самолёти Панжоб штатига қулаб тушганди.

 

 

 

Чўлпоной Аҳмедова