Ички ишлар ходимларига электрошокдан фойдаланишга рухсат берилди

 

 

Шунингдек, транспорт воситасини тўхтатиш, жабрланувчиларга ёрдам кўрсатиш ҳақидаги қонуний талабларни бажармаслик, айрим ҳолатларда эса, уларга нисбатан жисмоний куч ишлатиш, ҳуқуқбузарлар томонидан фуқароларга тан жароҳати етказиш ҳолатлари ҳам тез-тез кузатилмоқда. Албатта, фуқароларнинг бузилган ҳуқуқларини қисқа муддатда тиклаш ҳамда жазонинг муқаррарлигини таъминлаш ички ишлар ходимларининг биринчи галдаги вазифаси ҳисобланади.

 

Эндиликда баъзи вазиятларда ҳуқуқбузарлар томонидан ички ишлар органлари ходимлари ҳамда жабрланган фуқароларнинг ҳаёти ва соғлигига реал хавф туғилган тақдирда, ҳуқуқбузарларнинг ҳаракатларига зудлик билан чек қўйиш учун махсус восита ҳисобланган — электрошок қурилмасидан фойдаланиш зарурати туғилмоқда.

 

Шу боис, бугун, 24 сентябрдан бошлаб ички ишлар ходимларига электрошокдан фойдаланишга рухсат берилди. Бу ҳақда Ички ишлар вазирлиги хабар берди.

 

         “Электрошок қурилмасидан фойдаланишдан мақсад, ички ишлар ходимлари ёки фуқароларимизнинг ҳаёти ва соғлиғига шикаст етказилишининг олдини олиш, ҳуқуқбузарларнинг соғлиғига оғир ва ўта оғир тан жароҳати етказмаган ҳолда, зудлик билан ҳуқуқбузарлик ёки жиноий ҳаракатларни чеклашдан иборат”, — дейилади хабарда.

 

Ички ишлар вазирлигининг меъёрий ҳужжатларида махсус воситалар, хусусан, электрошок қурилмасини қўллаш бўйича аниқ мезонлар кўрсатиб ўтилган.

 

Ички ишлар ходими хизмат фаолияти давомида электрошок қурилмасини қўллашдан аввал махсус тайёргарликдан, даврий текширувдан ўтказилади. Шундан сўнг, ходимга тегишли сертификат берилади.

 

Эслатиб ўтамиз, аввалроқ "Абу-Сахий" яқинида "бита" кўтариб жанжал қилган "Cobalt" ҳайдовчисига тегишли чора кўриш ички ишлар бўлимига топширилгани ҳамда профилактика инспекторининг эгнидаги хизмат кийимини йиртган фуқарога жиноят иши қўзғатилгани ҳақида хабар берилганди.

 

 

Оламгир Абдиев