"Толибон" жангчиларидан амнистия шартларига амал қилишни талаб қилди
"Толибон" раҳбарларидан бири ҳаракат жангчиларидан амнистияга амал қилишни талаб қилди. Афғонистон мудофаа вазири мулла Ёқуб аскарлардан умумий амнистия шартларига амал қилиши кераклигини эслатиб ўтди.
"Одамлар билан яхши муносабатда бўлинг, кераксиз суратга олишларни бас қилинг ва ҳукумат идоралари биноларига заруратсиз киришни тўхтатинг", — деган мудофаа вазири.
У баъзи толиблар томонидан собиқ президент Ашраф Ғани даврида ишлаган шахслар, жумладан, ҳарбийлар қатағонга учраганини тан олди.
Мулла Ёқуб баъзи дала қўмондонлари ўз сафига ахлоқсиз шахсларни қўшиб олганини таъкидлаган. Эндиликда улар янги ҳукумат сиёсатига қаршилик қилгани учун жазоланиши кераклиги алоҳида қайд этилди.
Ушбу баёнот толибларнинг собиқ давлат хизматчиларига қилаётган ҳужумлари сабабли берилди. Жумладан, 24 сентябрга ўтар кечаси бир гуруҳ жангарилар собиқ ҳарбийлар уйига бостириб кириб, уларни ўлдиргани маълум бўлди.
Эслатиб ўтамиз, бундан "Толибон" ўлим жазосини тикламоқчи экани ҳақида хабар берилганди.
Жаҳонгир Қўзиев
