"Толибон" Россияни муҳим соҳада ҳамкорликка чақирди
“Толибон” наркотрафикка қарши Россия билан бирга курашмоқчи. Бу ҳақда ҳаракат расмий вакили Забиҳулло Мужоҳид маълум қилди.
Толиблардан иборат янги ҳукумат гиёҳванд моддалар контрабандасига бутунлай барҳам бериш ниятида. Мужоҳиднинг сўзларига кўра, бундай моддаларни етиштириш Афғонистон учун жиддий муаммо ҳисобланади. Шунингдек, расмий вакил: “Фермерларга қорадоридан бошқа экинлар ўстиришга имкон бериш керак. Контрабанда йўлларини йўқ қилишда кўплаб давлатлар, жумладан, Россия ёрдам бериши мумкин”, деган.
Шунингдек, у Афғонистондаги барқарорлик бутун минтақа манфаатларига мос келишини айтиб ўтди. Шу билан бирга, Афғонистон ички ишларига аралашмаслик, қурол контрабандасини тугатиш ва мамлакатдан олиб чиқиб кетилган бойликларни ортга қайтариш муҳимлигини таъкидлаган.
Афғонистон жаҳоннинг энг йирик гиёҳванд модда етиштирувчи давлатларидан бири. Бу ерда опий кукунининг 90 фоизи ишлаб чиқарилади. Ушбу моддаларнинг йиллик айланмаси бир неча миллиард долларни ташкил этади.
Бундан аввал Ҳиндистонда Афғонистондан келтирилган 3 тоннага яқин героин топилгани хабар қилинганди.
Жаҳонгир Қўзиев
