Абдулазиз Комилов Туркий тилли давлатлар кенгашининг Афғонистон бўйича йиғилишида иштирок этади
Ташқи ишлар вазири Абдулазиз Камилов бошчилигидаги Ўзбекистон делегация 27-28 сентябрь кунлари Афғонистон бўйича Истанбул шаҳрида бўлиб ўтадиган Туркий тилли давлатлар ҳамкорлик кенгаши (ТТДҲК, Туркий кенгаш) Ташқи ишлар вазирлари кенгашининг навбатдаги йиғилишида иштирок этади.
Ташқи ишлар вазирлиги ахборот хизматининг хабар қилишича, ТТДҲК Ташқи ишлар вазирлари кенгаши йиғилиши давомида хавфсизлик ва минтақавий иқтисодий ҳамкорликни янада ривожлантириш масалалари кўриб чиқилади.
Шунингдек, Афғонистондаги вазият муҳокама қилиниши режалаштирилган.
Маълумот учун: Озарбайжон, Қозоғистон, Қирғизистон, Туркия ва Ўзбекистон ТТДҲКга аъзо мамлакатлардир, шунингдек, Венгрия кузатувчи давлат мақомига эга. Ташкилот котибияти Истамбул шаҳрида жойлашган. Ўзбекистон ушбу ташкилотга 2019 йил 15 октябрь куни ТТДҲКнинг Бокуда (Озарбайжон) бўлиб ўтган 7-саммитида тўлақонли аъзо сифатида қабул қилинди.
Аввалроқ Ўзбекистон ташқи ишлар вазири Абдулазиз Комилов Саудия Арабистони Қироллигининг Фавқулодда вa мухтор элчиси Ҳишам ас-Сувайлим, Швейцариянинг фавқулодда ва мухтор элчиси этиб тайинланган Константин Оболенскийни қабул қилгани ҳамда Германия ташқи ишлар вазири билан учрашув ўтказгани ҳақида хабар берилганди.
