"Толибон" Покистон ядро қуролларини қўлга киритиши мумкинлиги айтилди
"Толибон" ядро қуролига эга бўлиши мумкин. Бу ҳақда Дональд Трампнинг миллий хавфсизлик бўйича собиқ маслаҳатчиси Жон Болтон маълум қилди.
Унинг сўзларига кўра, АҚШ қўшинларининг олиб чиқиб кетилиши ортидан толиблар Покистон ядро қуролига эгалик қилиши мумкин. "Афғонистонни назорат қилаётган ҳаракат Покистонни ҳам эгаллаши мумкин. Бу 150 га яқин ядро қуроли "Толибон" қўлига ўтиб кетишини англатади", — деган сиёсатчи.
Жон Болтон 2018-2019 йилларда собиқ президент Трамп админстрациясида ишлаган. У бундан олдин Афғонистондан АҚШ қўшинларининг олиб чиқилишини танқид қилганди. Болтон ўшанда Байденнинг АҚШ ташқи сиёсатини назорат қилишини шубҳа остига олган.
Маълумот ўрнида: Жорий йилнинг 15 август куни "Толибон" Кобул шаҳрини жангсиз эгаллади. Вашингтон 2021 йил август ойи охирида ўз қўшинларини Афғонистондан бутунлай олиб чиқиб кетди.
Аввалроқ Афғонистон Тожикистондан ички ишларга аралашмасликни талаб қилганди. Шунингдек, юзлаб афғонистонлик журналистлар эвакуация қилинмай қолиб кетгани хабар қилинганди.
Жаҳонгир Қўзиев
