Буюк Британия ўзига зарар етказган давлатларга қарши киберҳужумлар уюштиришини маълум қилди
Бу ҳақда мамлакат мудофаа вазири Бен Уоллес “The Sunday Telegraph” нашрига берган интервьюсида айтган.
“Баъзи давлатлар бизга қарши ҳар куни киберуруш олиб бормоқда. Халқаро меъёрларга кўра, биз ўзимизни ҳимоя қилиш ҳуқуқига эгамиз. Биз хавфли ва зарар келтирувчи кибероперациялардан ўзимизни ҳимоя қиламиз”, – деган Уоллес Буюк Британия миллий кибернетика кучлари ҳақида гапириб. Бу янги турдаги тузилма бўлиб, унда турли махсус хизматлар ва мудофаа вазирлиги ходимлари бирлашган. У 2020 йилнинг ноябрида тузилган эди. “The Sunday Telegraph” маълумотларига кўра, Буюк Британия миллий кибернетика кучлари штаб-квартираси учун 5 миллиард фунт-стерлинг сарфланган бўлиб, унда минглаб хакер ва киберхавфсизлик бўйича экспертлар хизмат қилади.
Уоллес киберҳужумлардан ҳимояланиш йўлларидан бири жавоб ҳужумлари эканини таъкидлади. Шунингдек, мудофаа вазири йирик киберҳужумларга мисол келтириб ўтди. Масалан, 2017 йилда WannaCry вируси орқали Бирлашган қироллик миллий соғлиқни сақлаш тизимига 92 миллион фунт (125 миллион доллар) зарар етказилган. Лондон ушбу ҳодисага жавобгар сифатида Шимолий Кореяни кўрсатган.
Уоллес кибермакон бугунги кунда янги фронт, янги жанг майдонига айланганини алоҳида таъкидлаган. “20 йилдан кейин нима бўлишини билмаймиз. Лекин бизга ҳозирча ҳалокатли, юқори даражадаги киберҳужум уюштирилгани йўқ”, — дея қўшимча қилган вазир.
Бундан аввал АҚШ, Буюк Британия ва Австралия кибермаконда ҳамкорликни кенгайтиришга келишиб олгани ҳамда Лондон афғон қочқинлари учун 40 миллион доллар ажратгани хабар қилинганди.
Жаҳонгир Қўзиев
