Москвада коронавирусга қарши эмланганлар ўртасида лоторея ўйналади
Бу ҳақда “Риа Новости” хабар берди. Москва мэри Сергей Собяниннинг маълум қилишича, бу эмлашга бўлган қизиқишни оширишга хизмат қилади.
Шу билан бирга, лотореялар орқали эмланиш жараёнини сезиларли даражада тезлаштириш мумкин. Москвада ушбу усул аввал ҳам қўлланилган. “Тез орада бу амалиётга яна қайтилиши мумкин. Аҳоли орасида фақат пулли ютуқлар эмас, балки квартиралар ҳам ўйналиши катта қизиқиш уйғотмоқда. Биз буни қайта жорий қилишга ҳаракат қиламиз”, – деган Собянин.
Россияда бутун дунёда бўлгани каби коронавирус билан боғлиқ вазият оғирлашмоқда. Ҳукумат ҳозирда бутун мамлакат бўйлаб оммавий тадбирларни бекор қилган. Россияда 4 октябрь куни 2 январдан буён касалланиш бўйича энг юқори кўрсаткич – 25 мингдан ортиқ ҳолат қайд этилган.
Бундан аввал ЖССТ раҳбари вакциналар тақсимотидаги адолатсизлик ҳақида гапирганди. Шунингдек, ЖССТ коронавирус келиб чиқиши бўйича янги текширув ўтказмоқчи экани хабар қилинганди.
Жаҳонгир Қўзиев
