Фуқароларга имтиёзли кредит олиб беришни ваъда қилган фирибгар ушланди
Андижонда фуқаро О.К. фуқаро О.Т.га ўзини гўёки Испания давлатида фаолият юритувчи банкнинг Ўзбекистон Республикасидаги вакили сифатида таништириб, ундан тадбиркорлик фаолияти учун мазкур банкдан 200 000 АҚШ доллар миқдорида имтиёзли кредит ажратиб бериш эвазига 6 300 АҚШ долларни алдов йўли билан олаётган вақтида қўлга олинган.
Бу ҳақда прокуратура департаменти хабар берди.
Шунингдек терговга қадар текширувда, фуқаро О.К. муқаддам фуқаролар К.А. ва Қ.Б.ларни ҳам шу йўсинда алдаб, улардан ҳам 21 500 АҚШ доллар олганлиги аниқланган.
Мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда.
Аввалроқ Тошкентда ўқишга киритиб қўйишни ваъда қилган фирибгар ва унинг шериги қўлга олингани ҳамда сохта прокуратура ходими вa унинг шериги ушлангани ҳақида хабар берилганди.
Муножат Валиева
