ЙТҲ га сабабчи бўлган "Spark" ҳайдовчиси қидирилмоқда
Бугун ижтимоий тармоқларда "Spark” ҳайдовчисининг шошқалоқлиги сабабли “Cobalt” ҳайдовчиси пиёдани уриб юборгани акс этган видеолавҳа тарқалди.
Мазкур ҳолат юзасидан Ички ишлар вазирлиги Йўл ҳаракати хавфсизлиги Бош бошқармаси маълумот берди.
Хабарда айтилишича, шу йилнинг 3 октябрь куни соат 11:00 да Тошкент шаҳар Бектемир тумани ТХАЙ кўчасида ҳайдовчи, 1972 йилда туғилган К.К. "Cobalt" русумли автомобилида қайрилиб олиш жойида йўлига чиқиб кетган "Spark"ка урилиб кетмаслик учун рулни ўнг томонга бурган ва йўл четида турган пиёда, 1987 йилда туғилган П.Б.ни уриб юборган.
Бунинг оқибатида пиёда П.Б. тан жароҳати олиб, шифохонага мурожаат қилган.
Мазкур ЙТҲ юзасидан Тошкент шаҳар ИИББ ЙҲХБ ходимлари айни пайтда ушбу ҳолатга алоқадор бўлган "Spark" русумли автомобиль ҳайдовчисини аниқлаш чорасини кўрмоқда.
Бундан аввал "Lаda 11184" ҳайдовчиси велосипеддаги фуқарони уриб юборгани ҳамда Тошкент вилоятида юк ташувчи автомобиллар иштирокида ЙТҲ содир бўлгани ҳақида хабар берилган эди.
Муножат Валиева
