Куба бокс терма жамоаси юртимизда етиб келди
Бугун жаҳон боксида катта обрўга эга давлатлардан бири бўлган Куба терма жамоаси тўлиқ таркиб билан юртимизга етиб келди.
Бундан икки йил олдин Ўзбекистон бокс федерацияси раисининг биринчи ўринбосари Сакен Полатов Куба бокс федерацияси президенти Алберто Пуиг билан учрашиб, ўзаро ҳамкорлик алоқаларини йўлга қўйиш юзасидан музокаралар ўтказган эди. Келишувга кўра, 2019 йилнинг ноябрь ойида Ўзбекистон терма жамоаси Кубада ўқув-машғулот йиғинлари олиб борганди. Ушбу келишувнинг давоми сифатида Куба терма жамоаси Ўзбекистонда юртимиз чарм қўлқоп усталари билан ўқув-машғулот йиғинларини ўтказадиган бўлди.
Айни кунларда ЎТЖ Тошкент вилоятининг Янгиобод ўқув базасида йиғин олиб бормоқда. Бугун кубаликлар ҳам йиғинга қўшилади ва ҳар икки мамлакат боксчилари олдинда турган жаҳон чемпионатига биргаликда тайёргарлик олиб боради.
Қўшма ўқув-машғулот йиғини 22 октябрга қадар давом этади. Шундан сўнг ҳар икки терма жамоа жаҳон чемпионатида иштирок этиш учун Белград шаҳрига жўнаб кетади.
Эслатиб ўтамиз, 25 октябрь – 6 ноябрь кунлари Сербиянинг Белград шаҳрида бокс бўйича жаҳон чемпионати бўлиб ўтади.
Аввалроқ, Шаҳрам Ғиёсов ва Ҳасанбой Дўсматов жаҳон чемпионатида иштирок этиши ва боксчи қизларимиз Болгариядаги халқаро турнирга йўл олгани ҳақида хабар берилганди.
Жамшидбек Амиров
