Pfizer ва BioNTech болаларни эмлаш учун лицензия сўраб Европа дори воситалари агентлигига мурожаат қилди
Pfizer ва BioNTech Европада 5 ёшдан 11 ёшгача бўлган болаларни эмлаш учун лицензия сўраб Европа дори воситалари агентлигига мурожаат қилди. Бу ҳақда компания матбуот хизмати хабар берди.
Катта эҳтимол билан Европада ушбу ёшдаги болаларни коронавирусга қарши эмлашга рухсат берилиши мумкин.
Компаниялар агентликка керакли маълумотлар, жумладан, тадқиқотнинг кейинги босқичлари натижаларини ҳам тақдим этган.
Pfizer ва BioNTech вакциналари олти ойликдан 11 ёшгача бўлган 2200 нафардан ортиқ болада синаб кўрилди. Болалар учун одатда катталарга нисбатан кичикроқ доза қўлланилади. Тадқиқот натижалари болаларда "кучли иммунитет реакцияси"ни кўрсатди, ишлаб чиқарувчилар вакцина болалар учун хавфсиз эканлигига ишонтирмоқда.
Аввалроқ АҚШ Президенти Жозеф Байден штатлар 5-11 ёшли болаларни пандемияга қарши эмлашни бошлашга тайёрлигини айтганди. Расмийлар Озиқ-овқат ва фармацевтика идорасининг бу борадаги қарорининг якуний тасдиғини кутмоқда.
Насиба Тўхтаева
