“Renessans TV” телеканали тақдимоти ўтказилди

 

Маълумки, ЎзЭОАВМА  элликка яқин нодавлат марказий ва ҳудудий телерадиоканалларни ўзи ичига олади. “Renessans TV” телетармоғи мамлакатимизнинг турли ҳудудларида фаолият кўрсатаётган 14 та нодавлат телеканални ўзида бирлаштиради. “Renessans TV” орқали  ушбу телеканаллар томонидан узатилган, ҳудудларда юз бераётган воқеа-ҳодисалар  ҳақидаги хабар ва янгиликлар, таҳлилий материаллар  республика бўйлаб тарқатилади. Шунингдек, “Renessans TV”нинг марказий таҳририяти суратга олган медиа-маҳсулотлар, сиёсий-ижтимоий дастурлар, фильм ва кўрсатувлар ҳудудий телеканаллар эфири орқали ҳам тарқатилиши  мумкин.

 

— Айни пайтга қадар “Renessans TV”ни давлат рўйхатидан ўтказиш, тегишли частоталарга уланиш билан боғлиқ ташкилий масалалар ҳал этилди, — дейди Ўзбекистон электрон оммавий ахборот воситалари миллий ассоциацияси раҳбари Жалолиддин Сафоев. — Ўзбекистон Республикаси Кинематография агентлигига қарашли фойдаланилмай турган бино Агентлик раҳбарияти билан келишилган ҳолда қайта таъмирланди.  Зарур жиҳозлар, техника воситалари келтирилди. Телеканалнинг ижодий ва техник жамоаси шакллантирилмоқда. 2021 йилнинг 1 сентябридан “Renessans TV” телеканали тест режимида иш бошлади. Ҳозирги кунда телеканал орқали муҳим янгиликлар, сайлов хабарлари, ўзбек киноижодкорлари томонидан  яратилган фильмлар, концерт дастурлари, ижтимоий роликлар мунтазам бериб борилмоқда. Тез орада телеканал тўлиқ форматда иш бошлайди. Унда мамлакатимизда амалга оширилаётган ислоҳотларнинг самаралари, халқимизнинг турмуш тарзи, юртимизда ва хорижда юз бераётган ҳодисалар тезкор ва холисона тарзда ёритиб борилади.

 

Телеканал ижодий жамоаси тақдим этаётган дастурлар “Юксалиш” умуммиллий ҳаракати, “Тараққиёт стратегияси маркази”, Ўзбекистон Журналистлари ижодий уюшмаси ва бошқа бир қатор нодавлат ташкилотлар раҳбарлари ва вакиллари, шунингдек, таниқли журналистлар, ёзувчилар, олимлар, соҳа экспертлари иштирокида муҳокама қилинди. Муҳокамалар жараёнида янги телеканални жамоатчилик минбарига айлантириш таклифи илгари сурилди.

 

“Халқаро медиа-холл”да ўтказилган тақдимот маросимида ЎзЭОАВМА бошқаруви аъзолари, мутасадди идоралар вакиллари, таниқли маданият ва санъат арбоблари, маҳаллий ва хорижий журналистлар, ижодкор ёшлар  иштирок этди. Телеканал ходимлари “Renessans TV”нинг ижодий ва техник имкониятлари хусусида атрофлича маълумот берди.

 

Эслатиб ўтамиз “Renessans TV” шу йилнинг 1-сентябридан тест режимида иш бошлаган эди.

Муножат Валиева