"Хорижда бўлишимизга қарамай, доим юртимиз сиёсий-иқтисодий ҳаётида доим фаолмиз"
Ўзбекистон Президенти сайловида муддатидан олдин овоз бериш жараёнларининг навбатдаги куни Ўзбекистоннинг Жанубий Кореядаги 17-Сеул сайлов участкасига қарашли Сеул шаҳридаги Сежонг университетида давом этди. Бу ҳақда "Дунё" АА хабар бермоқда.
Маълум қилинишича, ушбу олий билим юртида таҳсил олаётган ўзбекистонлик талабалар эрта тонгдан конституцион ҳуқуқидан фойдаланган ҳолда ўзлари муносиб деб топган номзодларга овоз бериш мақсадида Сежонг университетида ташкил этилган Ўзбекистон Президенти сайловида муддатидан олдин овоз бериш жараёнида фаол иштирок этди.
Яратилган имкониятлардан руҳланган талаба ёшлар ва мазкур олий таълим масканида фаолият олиб бораётган университет докторанти, юртдошимиз Отабек Жўраев фикр-мулоҳазалари билан бўлишди.
– Хорижда бўлишимизга қарамай биз доим юртимиз сиёсий-иқтисодий ҳаётида рўй бераётган жараёнларни диққат билан кузатиб борамиз. Бугун Ўзбекистон Президенти сайловида муддатидан олдин овоз бериш жараёни бизнинг университетимиз ҳудудида ташкил этилди. Бу эса, ўз навбатида, бизнинг талабаларга ўқув жараёнларидан ажралмаган ҳолда ўзлари муносиб деб топган номзодга овоз бериш учун кенг имконият яратди. Ушбу университетда юртимиздан келган 300 нафарга яқин талаба таҳсил олади.
Ўзбекистон Президенти сайловида муддатидан олдин овоз бериш жараёни республикамизнинг Жанубий Кореядаги 17-Сеул сайлов участкасига қарашли кўчма нуқталарда давом этмоқда, — дейилади хабарда.
Маълумот учун, Ўзбекистон Президенти сайловида иштирок этиш учун сайлов участкасига келиш имконияти бўлмаган юртдошларимиз 14-20 октябрь кунлари муддатидан олдин овоз бермоқда.
Аввалроқ Буюк Британия, Малайзия, Покистон ва Нидерландияда муддатидан олдин овоз бериш жараёни бошлангани, Ўзбекистондаги энг баланд нуқтада жойлашган сайлов участкаси ҳамда Туркияда яшаётган ўзбекистонликлар учун сайлов участкаси ташкил этилгани хабар қилинганди.
