“Дунё” ахборот агентлиги хабарига кўра, дипломатик ваколатхонанинг кўчма сайлов участкаси пойтахт шаҳарнинг Вулвич туманида жойлашган кўнгилочар маркази биносида жойлаштирилиб, мазкур муҳим тадбирга келаётган ватандошларимиз сайловда овоз бериши учун барча шароит яратилди.
Жумладан, сайлов участкаси санитария-эпидемиология талабларига риоя қилинган ҳолда тегишли жиҳозлар билан таъминланди.
Қайд этилишича, муддатидан олдин овоз бериш жараёнида 100 нафардан ортиқ Ўзбекистон фуқароси қатнашди. Шунингдек, кўчма сайлов участкасига оила аъзолари билан ташриф буюрган ватандошларимизга консуллик масалалари билан мурожаат қилиш ва кўтарилган масалалар бўйича тегишли маслаҳатлар олишга имконият яратилди.
Элчихона ходимлари билан суҳбат давомида, улар бундай тадбирлар ўзбекистонликларни янада жипслаштириши, сайлов жараёнида берилган ҳар бир овоз Ватанимиз равнақига ҳисса қўшишини таъкидлади.
Маълумот учун: Кустанайдаги ватандошларимиз Ўзбекистон Президенти сайловида бугун,19 октябрь куни муддатидан олдин овоз беради.
Эслатиб ўтамиз, 14-20 октябрь кунлари президент сайловида муддатидан олдин овоз бериш ўтказилади. Муддатидан олдин овоз бериш учун сайловчи сабабини кўрсатган ҳолда тегишли сайлов участкасига ариза билан мурожаат қилади.
Аввалроқ Малайзия, Покистон ва Нидерландияда муддатидан олдин овоз бериш жараёни бошлангани, Ўзбекистондаги энг баланд нуқтада жойлашган сайлов участкаси ҳамда Туркияда яшаётган ўзбекистонликлар учун сайлов участкаси ташкил этилгани хабар қилинганди.