Малайзияда ҳам муддатидан олдин овоз бериш жараёни давом этмоқда
Ўзбекистоннинг Малайзиядаги элчихонаси ҳузуридаги 25-сайлов участкасида ватандошларимиз муддатдан олдин овоз бериш жараёнида ўзлари танлаган номзодни сайлашда фаоллик кўрсатмоқда. Бу ҳақда "Дунё" АА хабар бермоқда.
Қайд этилишича, Малайзияда вақтинча яшаётган ёки таълим олаётган, 24 октябрь куни Ўзбекистон Президенти сайловида иштирок этиш учун сайлов участкасига келиш имконияти бўлмаган юртдошларимиз 14-20 октябрь кунлари муддатидан олдин овоз бермоқда.
"Куала-Лумпур шаҳрида жойлашган сайлов участкасида ватандошларимизга муддатидан олдин овоз бериш учун барча шароитлар яратилган. Жумладан, сайлов Малайзияда пандемия билан боғлиқ қабул қилинган чекловларга қатъий риоя қилган ҳолда бўлиб ўтмоқда", — дейилади хабарда.
Маълумот учун, муддатдан олдин овоз беришга келган ватандошларимиз давлатимиз раҳбарлиги учун курашаётган номзодларнинг дастурлари билан танишиб, ўзлари муносиб билган даъвогарга овоз беришмоқда. Сайлов жараёни миллий сайлов қонунчилиги, хусусан, янги қабул қилинган Сайлов кодекси ва Марказий сайлов комиссияси йўриқномаси асосида ташкил этилмоқда.
Аввалроқ Покистонда ва Нидерландияда муддатидан олдин овоз бериш жараёни бошлангани, Ўзбекистондаги энг баланд нуқтада жойлашган сайлов участкаси ҳамда Туркияда яшаётган ўзбекистонликлар учун сайлов участкаси ташкил этилгани хабар қилинганди.
