Келажак авлодларга умид ва ишонч берадиган қарорлар қабул қилиш вақти келди — Рим Папаси
Франциск, шунингдек, дунёда экологик қочқинлар сони ошишидан огоҳлантирди.
Рим папаси Франциск иқлим ўзгариши ва пандемия оқибатларини жаҳон уруши оқибатлари билан қиёслади. У бу ҳақда Глазгода бўлиб ўтаётган иқлим ўзгариши масалаларига бағишланган саммитда айтган.
“Пандемия ва иқлим ўзгаришининг инсониятга етказган зарари глобал урушлар оқибатлари билан бир хил. Халқаро ҳамжамият бугун ҳам, худди иккинчи жаҳон урушидан кейин бўлгани каби, бирдам ва узоқни кўзлайдиган ҳаракатларни амалга ошириши керак”, – деган Франциск.
Шунингдек, Рим папаси тез орада экологик мигрантлар сони кескин ошишидан огоҳлантирган. Шу сабабли у дунёни масъулиятли бўлишга чақирди. У келажак авлодга умид ва ишонч берадиган қарорлар қабул қилиш вақти етиб келганини таъкидлаган.
Шу билан бирга ривожланган давлатлардан қашшоқ мамлакатларга иқлим ўзгариши оқибатларини бартараф этиш учун кўмак беришни сўраган.
Бундан аввал Борис Жонсон иқлим ўзгаришини Жеймс Бонд фильмларидаги вазият билан қиёслаганди.
Жаҳонгир Қўзиев
