Жиноятлар занжири бирин-кетин очилди

 

Фуқаро У.А.нинг Қорақалпоғистон Республикаси ҳудудида олиб бораётган тадбиркорлик фаолиятига чек қўйилди. Маълум бўлишича, тадбиркорнинг маҳсулотини ЙПХ масканлари орқали Хоразм вилояти ҳудудига ўтказишга рухсат бериш эвазига бир гуруҳ шахслар томонидан пул талаб қилинган. Бу ҳақда У.А.нинг ўзи ҳуқуқ тарғибот органлари ходимларига ариза билан мурожаат қилган.

 

Унга асосан Давлат хавфсизлик хизмати, Иқтисодий жиноятларга қарши курашиш департаменти ҳамда Коррупсияга қарши курашиш агентлиги ҳамкорлигида тамагирлар кузатувга олинди. Унда фуқаро К.У. тадбиркордан 50 та юк машинаси учун 3,5 миллион сўмдан жами 175 миллион сўм миқдоридаги пулни пора сифатида олаётган вақтда жиноят устида ушланди.

 

Суриштирув жараёнида К.У. қўлга киритилган пул маблағларини шериги A.X.ga бериши кераклигини, у эса ушбу пулларни Қорақалпоғистон Республикаси ИИВ ходимларига бериши лозимлигини маълум қилган. Шунга кўра, шериги A.X.ga нисбатан қонуний чора кўришни сўраб ариза билан мурожаат қилди.

 

А.Х. тадбирни давом эттиришини маълум қилди ва ҳолат бўйича ариза билан мурожаат этди. Келишувга асосан, “Шадли аул” ЙПХ масканида хизмат олиб бораётган, Қорақалпоғистон Республикаси ИИВ ходими Р.Э. вақт оз қолганлиги ва тонг отгунигача улгуриш кераклигини айтиб, 3 та маҳсулот юкланган транспорт воситаларинигина ўтказа олишини билдирди.  Аризага мувофиқ, ўтказилган тадбирда Қорақалпоғистон Республикаси ИИВ ходими Р.Э. фуқаро А.Х.дан пул маблағларини олган вақтда жиноят устида қўлга олинди.

 

Мазкур ҳолат юзасидан юқоридаги шахсларга нисбатан Хоразм вилояти прокуратураси томонидан Жиноят Кодексининг 168-моддаси 4-қисми ва 25,211-моддаси 3-қисми билан жиноят иши қўзғатилиб, тергов ҳаракатлари олиб борилмоқда.

Муножат Валиева