Жайрон овловчилар устидан суд ҳукми ўқилди
Уларга озодликдан маҳрум қилиш жазоси тайинланди.
Хабарингиз бор, 2021 йил 24-май куни Қўнғирот туманида ўтказилган рейд тадбирлари давомида фуқаро Р.Б ва Б.Тлар ноқонуний равишда Ўзбекистон Республикаси “Қизил китоби”га киритилган сут эмизувчилар тоифасига кирувчи 11 бош жайронни овлаганликлари учун қўлга олинган эди.
Ҳолат бўйича барча ҳужжатлар расмийлаштирилиб тегишлилиги бўйича Орол табиатни муҳофаза қилиш прокуратурасига ўтказилган. Прокуратура томонидан эса ўз навбатида тергов, суриштирув ишлари олиб борилиб суд органига юборилган эди. Суд жараёни 2021 йил 2 ноябрь кунида якунланиб Жиноят ишлари бўйича Қўнғирот туман суди томонидан ҳукм ўқилди.
Ҳукмга кўра, қонунбузарлар Р.Б.га нисбатан 4 йил 1 ой муддатга озодликдан маҳрум қилиш жазоси, Т.Бга эса 4 йил муддатга озодликдан маҳрум қилиш жазоси тайинланди. Шунингдек, ҳайвонот дунёсига келтирилган жами 404 миллион 250 000 сўм зарар "Жанубий Устюрт" миллий табиат боғи фойдасига ундиришга қаратилди.
Аввалроқ, Бухорода қизил китобга киритилган чўл бўктаргиси (степной лунь) қушини сотмоқчи бўлганлар ушлангани ҳамда Сирдарёда лочинларни 280 миллион сўмга пулламоқчи бўлган шахслар қўлга олингани ҳақида хабар берилганди.
Муножат Валиева
