Қорақалпоғистонда ҳужжатларда кўрсатилмаган автомобиль шинаси божхона постида ушлаб қолинди
Маҳсулотнинг умумий қиймати 73 миллион 900 минг сўмни ташкил этган.
Қорақалпоғистон Республикаси божхона бошқармаси «Dovut-ota» чегара божхона постига қўшни мамлакатдан кириб келган фуқаро O.O. бошқарувидаги “DAF” русумли юк автотранспорт воситаси ўрнатилган тартибда божхона кўригидан ўтказилди.
Текширув давомида автомашинада кузатув ҳужжатларида ёзиб кўрсатилмаган, божхона ходимининг оғзаки сўровида айтилмаган қиймати 480 миллион сўмга тенг бўлган жами 12 тонна “полиэтилен плёнка” товари борлиги аниқланди.
Шу куни яна бир ҳолат аниқланди Мазкур пост орқали юртимизга кириб келган фуқаро M.P бошқарувидаги “DAF” русумли юк автотранспорт воситаси белгиланган тартибда божхона кўригидан ўтказилди. Текширув давомида, автомашинада умумий қиймати 73 миллион 900 минг сўмлик ҳужжатларда кўрсатилмаган автомобиль шинаси борлиги аниқланди.
Ҳозирда мазкур ҳолатлар юзасидан божхона органлари томонидан суриштирув ҳаракатлари олиб борилмоқда.
Аввалроқ, "Чуқурсой" ТИФ божхона постида Божхона юк декларацияси ва йўл юк кузатув ҳужжатларида кўрсатилмаган қиймати 258,7 миллион сўмлик 560 дона компьютер қувват манбаалари борлиги ҳамда Навоийда XIX асрга тегишли танга ва қоғоз купюраларни хорижга олиб чиқиб кетаётган шахслар аниқлангани ҳақида хабар берилганди.
Mуножат Валиева
