Афғонистоннинг халқаро захиралари музлатиб қўйилиши Доҳа келишувига зид бўлган — "Толибон"

 

“Толибон” АҚШ конгрессига очиқ хат ёзди. Мактубни мамлакат ташқи ишлар вазирлиги расмий вакили Абдулқодир Балхий ўқиб эшиттирган.

 

Унда Доҳа келишувларига амал қилишга чақирилган. Толиблар унга амал қилиш АҚШ манфаатларига ҳам жавоб беришини қайд қилган. Шунингдек, ҳаракат Кобулга шаҳар аҳолиси илтимоси билан киргани, сабаби Ашраф Ғани қочиб кетгандан кейин ҳокимият ваакуми пайдо бўлганлиги маълум қилинган.

 

“Толибон” ўзини суверен ва масъулиятли ҳукумат сифатида баҳолаган, улар коррупция ва қонун бузилишига қарши курашаётганлиги таъкидланган.

 

Шу билан бирга улар АҚШни иқтисодий санкцияларни бекор қилишга чақирган.

 

“Афғонистон халқаро активларининг музлатиб қўйилиши кутилмаган ва Доҳа келишувларига зид ҳодиса бўлди. Бу Афғонистонда мавжуд барча муаммолар асосий сабабчиси ва АҚШ обрўсига жиддий путур етказади.

АҚШ ўз санкцияларини бекор қилмаса, қишда жуда катта гуманитар ҳалокат ва миграция содир бўлади, бу эса барча учун янги муаммоларни вужудга келтиради”, – дейилади мактубда.

 

Аввалроқ Афғонистонда 2021 йилда гиёҳванд моддалар ишлаб чиқариш кўпайгани маълум қилинганди.

 

Жаҳонгир Қўзиев