Афғонистонда гиёҳванд моддалар етиштириш кўпайган — БМТ
Шунингдек, мамлакат ичкарисида унинг нархи ошганлиги маълум қилинди.
Афғонистонда 2021 йилда гиёҳванд моддалар ишлаб чиқариш 8 фоизга ортган. БМТ гиёҳванд моддалар ва жиноятчиликка қарши кураш бошқармаси маълум қилди.
Малъумотларга кўра, бу йил 6.8 тонна гиёҳванд модда етиштирилган.
“Бу ўсиш шуни англатадики, бутун дунёга 320 тонна тоза героин чиқиши мумкин”, – дейилади бошқарма ҳисоботида.
Таъкидланишича, Афғонистон жаҳондаги 85 фоиз опий ишлаб чиқаради.
“Афғонистонда шаклланган вазият халқаро ҳамжамиятнинг зудлик билан аралашувини талаб этмоқда. БМТ кўмагида гиёҳванд моддаларнинг ноқонуний етиштирилиши ва ишлаб чиқарилишига, шунингдек, бутун дунёда бу товарга талаб пасайишига эришиш керак”, – деб қайд этилган ҳисоботда.
Қўшимча қилинишича, 2021 йилда опиумлар етиштирилишидан Афғонистонда 1.8 миллиард доллардан 2.7миллиард долларгача фойда олинган. Мамлакатдаги сиёсий беқарорлик эса унинг нархи икки баробар ошишига сабаб бўлган.
Аввалроқ Афғонистон собиқ президенти Ҳамид Карзай ИШИД хавфи ҳақида фикрларини айтганди. Шунингдек, Қозоғистон шимолида Афғонистон фуқаролари қўлга олингани ҳақида хабар қилинганди.
Жаҳонгир Қўзиев
