Ўзбекистонда икки турдаги янги автомашина ишлаб чиқарилади
Шунингдек, автомобиль саноатида экспорт ҳажмини 1 млрд долларга етказиш режалаштирилмоқда.
“UzAutoMotors” иккита енгил машина моделини ишлаб чиқаришни йўлга қўяди. Бу ҳақда Янги Ўзбекистоннинг 2022–2026 йилларга мўлжалланган тараққиёт стратегиясида маълум қилинган.
Қайд этилишича, 2022 йилдан автомобиль саноатида кооперацияни янада ривожлантириш орқали ишлаб чиқариш ҳажмини 1,4 баробарга, экспорт ҳажмини 2 баробарга кўпайтириш кўзда тутилган.
Соҳадаги мавжуд корхоналарнинг ишлаб чиқариш қувватларни ошириш мақсадида:
янги бирлашган глобал платформасига (“GEM”) ўтиш орқали йиллик қуввати 190 минг дона бўлган 2 та янги енгил автомобил моделини ишлаб чиқариш;
“UzAutoMotors” Хоразм вилояти филиалининг автомобил ишлаб чиқариш қувватини 70 мингдан 100 мингтага ошириш режалаштирилган.
Шунингдек, экспорт ҳажмини 2026 йилга қадар 1 миллиард долларга етказиш бўйича йўл харитаси ҳам ишлаб чиқилади. Жумладан, “Nexia” автомобилларини Қозоғистонда тўлиқ циклда ишлаб чиқаришни йўлга қўйиш орқали йилига 30 минг донагача машинокомплектлар экспорти амалга оширилади.
