Ўзбек-тожик чегарасида назорат кучайтирилди
Бунга “Omicron” штамми тарқалиши сабаб бўлган.
Ўзбекистонда коронавируснинг “Omicron” штамми аниқлангани сабаб ўзбек-тожик чегарасидаги назорат кучайтирилмоқда. Бу ҳақда Тожикистоннинг Суғд вилояти санитария-эпидемиология хизмати раҳбари ўринбосари Мажнун Орипов маълум қилди, деб хабар бермоқда Darakchi.uz нашри.
Орипов таъкидлашича, эндиликда Ўзбекистон ҳудудига кираётган ҳар бир киши ПЗР тестини топшириши шарт.
"Ҳозирги кунда Конибодамдаги "Патар", Мастчи туманидаги Фотеҳобод, Панжикентдаги Саразм, шунингдек, "Хўжанд" халқаро аэропортида тиббиёт ходимлари кечаю кундуз навбатчилик қилмоқда", – деди Орипов.
Назорат-ўтказиш пунктларида ПЗР текшируви бепул. Шундай бўлса-да, Ўзбекистон Тожикистон фуқароларидан барча назорат пунктларида ушбу турдаги тиббий кўрикдан ўтганлиги учун 110-120 минг сўм (120-130 сомони) олаётгани айтиб ўтилган.
Бундан ташқари, Ўзбекистонга кирувчи барча фуқаролар касаллик тарқалишининг олдини олиш учун 2 ҳафта давомида уй карантинида бўлишлари керак.
