"Янги Ўзбекистон" боғи ёпилди

 

Ижтимоий тармоқларда “Янги Ўзбекистон” боғининг йўлакларидаги чўкишлар, ёриқлар юзага келгани ва боғнинг марказида қад ростлаган “Истиқлол” мажмуасига зарар етгани акс этган фотолавҳалар тарқалди. 

 

Маълумот учун: “Янги Ўзбекистон” боғи Мустақилигимизнинг 30 йиллиги муносабати билан бунёд этилган бўлиб, унинг тантанали очилиш маросими 31 август куни ўтказилган. Боғнинг дизайни улкан дарахтнинг беш новдасини акс эттиради. Шунингдек, унда Ўзбекистоннинг 3 минг йиллик тарихи, аждодларнинг буюк мероси, ўзбек халқининг миллий қадриятлари ўз ифодасини топган. 

 

Интернет тармоқларида тарқалган ҳолат юзасидан борганимизда, боғ ёпилганига гувоҳ бўлдик. 

Бу ҳудудда ўрнатилган янги йил арчаси ва безаклар олингандан сўнг тозалаш ишлари билан боғлиқлиги маълум қилинди. 

 

—  Ўнинчи январдан бери боғ ёпиқ, ичкарида фақат тозалов ишлари бўляпти. Бузилган жойлар ёки уларни тузатиш ҳақида эшитмадик биз, деди боғ қўриқлаш хизмати ходими. 

 

Боғ атрофини тозаловчи фаррош аёлдан вазият ҳақида сўраганимизда, у бундай ҳолатга кўзи тушмагани, боғнинг тозалаш ишлари учун ёпилгани ва қайта реконструкция ишлари ҳақида маълумоти йўқлигини айтди.

 

— Ер чўкиб қолган жойлар бор, аммо уни жойида тўғрилаб кетишади. Лекин мен монументнинг ранглари кўчиб тушаётгани ҳақида билмайман. Эшитмадим, дейди фаррош аёл. 

 

Муҳокамаларга сабаб бўлаётган вазиятга ойдинлик киритиш ва масъуллардан маълумот олиш учун Тошкент шаҳар ҳокимлиги билан боғландик. Расмийлар боғнинг бугунги муҳокамага сабаб бўлаётган аҳволи ҳақида изоҳ беришлари учун расмий хат юборишимиз ва маълум вақт ўтгандан кейин маълумот беришларини айтишди. Биз эса ҳолат юзасидан расмийлар изоҳини кутиб қоламиз.

 

Зиёда Муҳаммадова,  Ойбек Шукуров