Жосуслик дастури туфайли оддий телефонлар савдоси ошди
Pegasus дастури атрофидаги можаро ҳали тингани йўқ.
Исроилда Pegasus жосуслик дастури атрофидаги можаро фонида Nokia телефон аппаратлари савдоси ошиб кетди.
Можаро "Калькалист" газетасида эълон қилинган йирик журналистик суриштирувдан сўнг бошланди. Мақола муаллифлари таъкидлашича, жосуслик дастури полиция хабари билан сиёсатчилар, давлат арбоблари, йирик ташкилот раҳбарлари ва бошқаларнинг телефонига ўрнатилган.
Журналистлар бу қонунга хилоф эканини айтишмоқда. Маълумотлар аниқ бир мақсад билан эмас, балки "иш бериб қолар" деган фикр билан кузатилган.
Америка махсус хизматларининг собиқ ходими Эдвард Сноуден Байденнинг ҳам телефони кузатилганини айтган эди.
Эслатиб ўтамиз, аввалроқ Франция президенти Эммануэль Макрон, ўша пайтдаги бош вазир ва яна 14 вазирнинг телефонларида Исроилнинг Pegasus дастурий таъминоти орқали жосуслик қилинган бўлиши мумкинлиги ҳақида хабар берилганди. Шунингдек, "Guardian" нашри дунёнинг 11 мамлакатидаги ҳукумат амалдорлари Исроилнинг "NSO Group" компаниясига қарашли "Pegasus" жосуслик дастуридан журналистлар ва мухолифатдаги сиёсатчиларни кузатишда фойдаланганини ёзганди.
Шарофат Маҳмудова
