НАТО Россияни янги мулоқотга чақирди
Ташкилотга кўра, Альянс Украинани қўллаб-қувватлайди, аммо Россияга таҳдид қилиш нияти йўқ.
НАТО бош котиби Йенс Столтенберг Россия ташқи ишлар вазирлигига Россия-НАТО кенгашининг янги йиғилишини ўтказиш таклифи билан мурожаат қилди.
"Бугун эрталаб мен Россия ташқи ишлар вазири Сергей Лавровга мактуб йўлладим. Россия-НАТО кенгаши йиғилишларининг давом этиши ўзаро ишонч учун муҳим", - деган Столтенберг.
У “дипломатик йўлни топиш” муҳимлигини таъкидлаган.
“Биз Россия хавотирларини тинглашга ва Европа хавфсизлигининг асосий тамойилларини мустаҳкамлашни муҳокама қилишга тайёрмиз. Лекин НАТО асосий тамойиллар – ҳар бир давлатнинг ўз йўлини танлаш ҳуқуқи бўйича муросага келмайди”, - деган бош котиб.
Унинг сўзларига кўра, Россия Федерацияси Украина билан чегарада ўз ҳарбий кучларини мустаҳкамлашда давом этмоқда.
Хабарда айтилишича, Альянс Украинани қўллаб-қувватлайди, аммо Россияга таҳдид қилиш нияти йўқ.
Ўз навбатида, Британия бош вазири Борис Жонсон Россия Украинага бостириб кирса, Британия “олдинга боришга” ва Украинага қўшимча ҳарбий ёрдам кўрсатишга тайёрлигини истисно этмади.
Аввалроқ Россия президенти Туркияга ташриф буюриши мумкинлиги хабар қилинган эди.
