“Бу навбатдаги жангларимга тайёргарлик вазифасини бажариб беради”
Баҳодир Жалолов 18 март куни яна рингга кўтарилади.
Бир неча кун олдин оғир вазн тоифасидаги ўзбекистонлик боксчи Баҳодир Жалоловнинг навбатдаги рақиби маълум бўлганди. Zamon.uz спортчи билан боғланиб, ушбу жангга тайёргарлик жараёни ҳақида маълумот олди.
Жалоловнинг сўзларига кўра, айни дамда у мураббийлари қўли остида Тошкент вилоятидаги Янгиобод ўқув базасида машғулот олиб бормоқда.
“Кейинги рақибим полшалик Камил Цоколовскига қарши бўлиб ўтади. У бир қатор кучли боксчилар билан муросасиз баҳс олиб борган. Менинг промотрларим шу боксчини тавсия этишди. Сабаби бу навбатдаги рақибларим билан бўладиган жангларга тайёргарлик вазифасини бажариб беради. Ушбу жанг 8 роунддан иборат бўлади. Ниятим бу жангимда ҳам ғалаба қозониб рейтингимни ошириб олиш. Ҳозирда тайёргарлик жараёнини Янгиобод ўқув базасида олиб боряпмиз. Яқинда Россиядан спарринг рақибларимиз келиши керак. Шуларни кутяпмиз”.
Эслатиб ўтамиз, Баҳодир Жалолов ўзининг профессионал йўналишдаги навбатдаги жангини 18 март куни Дубай шаҳрида ўтказади. «Пробеллум» компанияси томонидан ташкил этиладиган бокс оқшомида унга полшалик Камил Цоколовски рақиблик қилади. Жалолов охирги жангида колумбиялик Хулио Сезар Калименони биринчи роунддаёқ мағлубиятга учратганди. Шу кунгача боксчимиз проф боксда 9 марта жанг ўтказиб, уларнинг барчасида рақибларини нокаутга учратган.
Маълумот ўрнида: Жалолов 2019 йил жаҳон чемпионатида ва Токио Олимпиядасида чемпионликни қўлга киритган.
Жамшидбек Амиров
