Макрон ва Путин Донбасс масаласи бўйича учрашишга келишиб олди
Яқин соатларда алоқа гуруҳи Донбассда ўт очишни тўхтатиш бўйича йиғилиш ўтказади.
Франсия президенти Эммануель Макрон ва Россия раҳбари Владимир Путин яқин орада Донбасда ўт очишни тўхтатиш бўйича алоқа гуруҳи йиғилишини ташкил этишга келишиб олди. Шунингдек, янги хавфсизлик архитектурасини белгилаш масаласи ҳам кўндаланг турибди.
Бу ҳақда Елисей саройи хабар бермоқда.
Франсия етакчисининг қўшимча қилишича, икки давлат раҳбари мустаҳкамлашга келишиб олган дипломатик ишнинг натижаси Европада тинчлик ва хавфсизликнинг янги архитектурасини белгиловчи саммит бўлиши керак.
Ўз навбатида, Reuters агентлигининг ёзишича, Россия ва Франсия ташқи ишлар вазирлари яқин кунларда Европада хавфсизлик масалалари бўйича саммит ташкил этиш масаласини ҳам муҳокама қилади.
Шунингдек, G7 мамлакатлари вакиллари Россиядан Украина чегаралари яқинида ҳарбий иштирокини камайтиришини кутишмоқда.
