Ўзбекистонга тоғли ҳудудлар учун мослашган электровоз олиб келинди
Хитойда ишлаб чиқарилган ушбу электровоз соатига 120 км тезликда ҳаракатлана олади.
Хитойнинг “CRRC Group” компанияси томонидан ишлаб чиқарилган электровозлар Ўзбекистоннинг иқлим шароитига мосланган. Мазкур транспорт тоғнинг мураккаб рельефли ҳудудида жойлашган “Термиз минтақавий темирйўл узели”да темирйўл ташувларини амалга оширишда анча қўл келади.
2 секциядан иборат мазкур электровозлар об-ҳавонинг барча шароитларида оғир юклар билан ортиқча қийинчиликларсиз ҳаракатлана олади. Техник тавсифига кўра, ушбу турдаги локомотив тезликни соатига 120 км.гача ошириши мумкин. Ҳар бир локомотивнинг ишлаш муддати – 40 йил.
Электровоз TOSHIBA компанияси томонидан ишлаб чиқарилган TCMS замонавий назорат-диагностика тизими билан жиҳозланган. Ушбу тизим электравозни ортиқча юкланишлардан, носозликлардан ҳимоя қилади ва машинистга ўз вақтида хабар беради. Яъни электравознинг электрон ускуналарининг ҳолати, юқори ва паст кучланишли электр жиҳозларининг ҳолати, тормоз тизими, хавфсизлик тизими, радиоалоқа тизими ва бошқа тизимларнинг созлигини монитор орқали кўрсатиб туради.
