Саудия Арабистони мудофаа саноатини кучайтирмоқчи
Мамлакатда дунёдаги энг йирик ҳарбий заводлардан бирини қуриш режалаштирилган.
Саудия Арабистони учувчисиз қурилмалар ишлаб чиқаришни йўлга қўймоқчи. Бу ҳақда "ТАСС" хабар берди.
Саудия ҳарбий-саноат компанияси (SAMI) раҳбари Валид Абу Холиднинг маълум қилишича, ушбу техника 100 фоиз Саудия Арабистонида ишлаб чиқарилади ва қуролли кучларга етказиб берилади. "Биз дронлар билан шуғулланадиган кўплаб хориж компаниялари билан ҳамкорлик қиляпмиз. Улар бизга шахсий қурилмаларни ишлаб чиқишда ёрдам бермоқда. Шу билан бирга, ҳозирда дунёда ўқ-дори ишлаб чиқарувчи энг йирик завод қуриш устида ишлаяпмиз", — деган у Ар-Риёд халқаро мудофаа саноати маҳсулотлари кўргазмасида.
Абу Холид 2030 йилга келиб қироллик 50 фоиз ҳарбий харажатлари мамлакат ичидаги компания маҳсулотлари учун сарфланишини қўшимча қилган.
Эслатиб ўтамиз, аввалроқ Эрон Саудия Арабистони билан муносабатларни яхшилашга тайёрлигини маълум қилганди.
