Cotton Campaign Ўзбекистонга қўйилган тақиқни бекор қилди

 

2022 йил 10 март куни халқаро Cotton Campaign нотижорат ташкилоти Ўзбекистонга нисбатан жорий этилган 12 йиллик санкцияларни бекор қилди. Бу мамлакат иқтисодиётига қандай таъсир кўрсатади? Қуйида шу борасида фикр юритилади. 

 

Cotton Campaign қандай ташкилот? 

 

Cotton Campaign – халқаро меҳнат ва инсон ҳуқуқлари ҳимояси билан шуғулланувчи ташкилотлар, инвестор ва бизнес жамоалари коалицияси. Унинг мақсади – пахта етиштиришда болалар ва мажбурий меҳнатни йўқотиш. 

 

Содда қилиб тушунтирганда – Cotton Campaign пахта етиштирувчи давлатларнинг имиджини белгилайди. Ташкилот доимий равишда соҳани мониторинг қилиб боради. Унда инсон ҳуқуқлари бузилмаслиги, мажбурий меҳнатга, энг аввало болалар меҳнатига йўл қўймаслик талаб этилади. 

 

Ўзбекистонга қачон тақиқ қўйилган?

 

2009 йилда бир гуруҳ Ўзбекистон фуқаролари Cotton Campaign’га мурожаат билан чиқади. Улар пахта кампаниясида мажбурий меҳнатдан фойдаланилаётганлиги ортидан ўзбек пахтасига бойкот қўллашни сўрайди. 

 

Ўша йили уларнинг ташкилотга тақдим этган петициясини 47 киши имзолаган. Улар орасида сўнгги йилларда сиёсий таҳлилчи сифатида танилган Камолиддин Раббимов ҳам бор. 

 

Шундан кейин Cotton Campaign бунга рози бўлади. Оқибатда 331 бренд ва ритейлер компаниялари Ўзбекистон “оқ олтин”ини сотиб олишдан бош тортди. Оқибатда ўзбек пахтаси учун Ғарб бозорлари амалда ёпилди. 

 

Расмий Тошкент сўнгги йилларда Cotton Campaign’дан тақиқни олиб ташлашини сўраб бир неча бор мурожаат билан чиқади. Масалан, 2020 йил апрелида Бандлик ва меҳнат муносабатлари вазири Нозим Ҳусанов ташкилотга очиқ хат ёзади. Унда Республикада мажбурий меҳнат, айниқса, пахта кампаниясида бу иллат бутунлай йўқ қилингани тилга олинган.

 

Олиб ташланган тақиқ қандай имкониятлар тақдим этади? 

 

Бандлик ва меҳнат муносабатлари вазирлиги Давлат меҳнат инспекцияси бошлиғи Қудратилла Одинаевнинг сўзларига кўра, бойкотнинг бекор қилиниши, энг аввало, ўзбек пахтасининг жаҳон бозорига чиқиш имкониятларини кенгайтиради. Шунингдек, эндиликда дунёдаги йирик ва машҳур брендларни Ўзбекистонга жалб этиш мумкин. 

Бу, ўз навбатида, пахтачилик ва у билан бевосита боғлиқ бўлган текстил саноатининг янада ўсишига сабаб бўлади. 
Умуман олганда, бойкотнинг бекор қилиниши – Ўзбекистон учун катта ютуқ. Бу – Республикада олиб борилаётган тизимли ислоҳотларнинг натижасидир.