ГФР собиқ канцлери Украинадаги вазиятни юмшатиш учун Москвага борди – Bild
Нашр маълумотларига кўра, буни Украина ҳукумати илтимос қилган.
Германиянинг собиқ федерал канцлери Герхард Шрёдер Украина ҳукумати илтимосига кўра Россияга борди. Бу ҳақда Bild газетаси хабар берди.
Газета маълумотларига кўра, Шрёдер ушбу ташрифини ўзи аъзо бўлган Гемания социал-демократик партияси билан ҳам, ГФР ҳукумати билан ҳам муҳокама қилмаган. У бир неча кун аввал ўз яқинларига Москвага боргани ҳақида айтган.
Пайшанба куни Американинг Politico газетаси собиқ канцлер Москвага Путин билан Украинадаги вазиятни муҳокама қилиш учун боргани тўғрисида хабар тарқатди. Газета маълумотларига кўра, Шрёдер бундан олдин Туркияда Украина делегацияси аъзоларидан бири билан мулоқот қилган.
Германиянинг амалдаги канцлери Олаф Шольц бу хабарларга муносабат билдирмади.
Маълумот ўрнида: Герхард Шрёдер 1998-2005 йилларда Германия ҳукуматини бошқарган. Ўз вақтида у Германияни Россиянинг ЕИдаги асосий хамкорига айлантирди. Шрёдер ва Путин дўст сифатида кўрилади.
Собиқ канцлер 2017 йилдан буён "Роснефть" директорлар кенгаши раиси ҳисобланади. Шунингдек, у Nord Stream AG акционерлар қўмитаси ва шу компания директорлар кенгашига раислик қилади.
Эслатиб Ўтамиз, аввалроқ Олаф Шольц собиқ ҳамкасбидан Россия компанияларига раҳбарлик қилишни тўхтатишни сўраганди.
