Ироқ ўзаро ҳисоб-китоб майдони эмас — Мустафо ал-Козимий
Аввалроқ Эрон Ироқ ҳудудига ракета зарбалари берганди.
Ироқ бош вазири унинг мамлакатини шахсий ҳисоб-китоб майдонига айлантирмасликни сўради. Бу ҳақда у АҚШ давлат котиби Энтони Блинкен билан суҳбатда айтган.
Мустафо ал-Козимий Ироқни ташқи кучларнинг шахсий ҳисоб-китоб майдонига айлантирмаслик муҳимлигини таъкидлаган.
У Бағдод халқаро ва минтақавий миқиёсда ўз ўрнини мустаҳкамлаётганига эътибор қаратган. Блинкен ўз навбатида "Қўшма Штатлар Ироқ билан бирдамлигини ва унинг хавфсизлиги ҳамда суверенитети учун барча чораларни қўллаб-қувватлашини" маълум қилган.
Маълумот ўрнида: 13 мартга ўтар кечаси Ироқ шимолидаги Арбил шаҳрига ракета зарбаси берилди. У АҚШ консулхонаси яқинида портлаган. Шунингдек, маҳаллий телекнал офисига зарар етган.
Эрон ҳужум бўйича жавобгарликни зиммасига олди. Қатор ОАВ зарбалар аслида "Моссад"нинг махфий базасига берилганини ёзган. Аммо Ироқ Курдистони ҳукумати буни инкор қилди.
Эслатиб ўтамиз, аввалроқ Ироқда ИШИД хавфи юқорилигича қолаётгани тўғрисида хабар берилганди.
