Магистр талаба Олимпия чемпионлигини мақсад қилган
Бокс бўйича жаҳон чемпионати совриндори Мадиёр Саидраҳимов айни кунларда нима билан банд?
2021 йилнинг 25 октабрь - 6 ноябрь кунлари Сербиянинг Белград шаҳрида бокс бўйича жаҳон чемпионати бўлиб ўтганди. Унда Ўзбекистон терма жамоаси сафида Абдумалик Ҳалаков кумуш медални қўлга киритган бўлса, Мадияр Саидраҳимов бронза медали соҳибига айланди.
Айни кунларда боксчиларимиз навбатдаги машғулотларини олиб боришмоқда. Биз Мадиёр Саидраҳимовдан мусобақаларга тайёргарлик жараёни қандай ўтаётгани ҳақида маълумот олдик. Спортчининг сўзларига кўра, у айни дамда Ўзбекистон жисмоний тарбия ва спорт университетининг магистратура босқичида таҳсил олади.
“Мен Жисмоний тарбия ва спорт университетида тўрт йил давомида таҳсил олганман. Ҳозирда магистратура босқичида ўқишимни давом эттирмоқдаман. Университетда талабаларнинг ҳам ўқишига, ҳам машғулот ўтказишига жуда яхши имкониятлар яратилган”.
Мадиёр Саидраҳимов ана шундай шароитлар натижасида ҳозирда халқаро мусобақаларда муносиб иштирок этиб келаётганини таъкидлади. Ўтган йили Сербияда ўтган жаҳон чемпионатидан сўнг боксчи машғулотларни давом эттирмоқда.
“2023 йил юртимизда жаҳон чемпионати, 2024 йилда эса Францияда Олимпия ўйинлари ўтказилади. Бугунги кунда ушбу турнирларга қизғин тайёргарлик жараёнини олиб боряпмиз”.
Мадиёр мақсади мазкур мусобақаларда олтин медални қўлга киритиш эканлигини айтиб ўтди. 2021 йилги жаҳон чемпионатида чемпионлик учун унга бироз тажриба етишмаганини маълум қилди.
“Ярим финалда кубалик кучли боксчига имкониятни бой бериб қўйдим. Кейинги чемпионатларда чемпионлик учун бемалол кураш олиб борсам бўлади”.
Спортчи навбатдаги турнирларда ўзбек боксчиларининг ғалабали онлари яна узоқ давом этишини таъкидлади.
Жамшидбек АМИРОВ суҳбатлашди
